De Heiligdomsvaart Ommegange Juni 2025
Dit jaor höbbe veer de 3 Ommegange begeleidt en wel op: zaoterdag 14 juni en op de zoondag 15 en 22 juni.
Zaoterdag 14 juni
De Jäög-ummegaangk vertrok vaanaof Centre Ceramieque, naodat euze Börger, d’n hier Wim Hillenaar, de deilnummers touwgesproke had.
De deilnummers waore diverse sjaole en jäögvereineginge oet ’t Mestreechse en euze Väös naom de kinder mèt, mèt e “sleutel”-verhaol langs de volgende plekke:
Plein 1992, Waterteurentje, Ruiterij, Hoeg Brögk, Stadswal, Stokstraot, Op de Therme, Breistaot, Vriethof, Vagevuur en Bergportaol, boe e verhaol vertèld woort of e meziekstök door de jäög oetgevoerd woort of dans en zaangk waor te bekieke en te beluustere en boe Brassband “Bombrasstic” de gróp in schwung brach.
De jäög heet op ’n plesante en späölse meneer mèt gekrege wie Sint Servaos in Mestreech terech gekoume is en wat heer veur Mestreech beteikend heet.
Zoondag 15 juni
Op zoondag de 15de voond d’n ierste ommegang plaots, verzamele um 12.00 oor bij de Stadsbrouwerij op de Oeverwal, boe veer op verzeuk vaan de organisatie de opstèlplaotse vaan de groupe mèt kriet markeerde. Roond 12.15 oor koume de ierste gróppe, terwijl d’n Ommegang pas um 14.00 oor begint.
D’n Ommegang is ’n sjoen percessie begeleidt mèt ’n hiemels zönneke, boe roond de 50.000 lui stoon te loere nao ’n aontal gróppe.
De gróppe variëre vaan Romeine tot Dragersgildes en broedersjappe, dansers, hermenie, fanfares en sambaband. Mèt Sint Servaos begint en indeg d’n Ommegang.
Zoondag 22 juni
Zoondag 22 juli is de 2de Ommegang in de vörm vaan ’n aovendpercessie
Vaanoet Treech weure diverse gróppe mèt de boot nao Mestreech gebrach, boe bij Stiphout aongelag weurt en boe de gróppe opgestèld stoon en “ingerits” weure.
Dees aovendpercessie heet toch ‘nen aandere fibe es de daagpercessie, meh is neet minder sjiek. De deilnummende gróppe zien naogenóg dezelfde es de week daoveur.
