Vastelaovendszoondag “De Groeten Optoch”
Roond de klok vaan 10.00-10.30 oor verzamele alle Trekkers ziech bij Kaffee ’t Pothuiske, De ierste actie vaan dizzen daag is ’t oetrope vaan “de Trekker boe op geduid moot weure”. Dit is e gebaar nao ‘ne verdeenstelleken Trekker. Daonao goon veer same genete vaan e geweldeg “oontbijt/lunch” wat door Coen en 2 vaan eus dames geprizzenteerd weurt.
Roond 12.00 oor zien de ierste Trekkers in Wieck, Lieg/Hoeg Barakke, boe gekeke weurt of de Vastelaovendswagele en gróppe ziech op de gooj plaots opgestèld höbbe. Hei en dao moot nog get gewijzeg weure, meh roond de klok vaan 13.20 oor steit al zoeväöl meugelek opgestèld volgens ’t drejbook vaan de Tempeleers.
Um 13.33 oor start de cortège. Die vaan US vertrekke es ierste, daonao ’t Garderizzjemint De Kachelpiepers en Zienen Hoegen Hoeglöstegheid Carlo d’n Ierste.
De ierste Trekkers loupe mèt dees gróppe mèt um ziech daonao allemaol te plaotse op de plaotse boe ze ingedeild zien.
De taak is zörge tot de cortège blijf loupe. Dit geit neet vaanzelf, meh mèt flair en vruntelekheid hawwe ze de schwung drin.
Roond de klok vaan 16.00 oor vertrèkke de lètste gróppe in Wieck, meh door ’t groet aontal gróppe en de gróppe die in/oet de cortège goon, doort ’t toch nog tot 18.00 oor veurtot de lètste wagel, de Hèkkewagel, ’t Vriethof op kump.
Veur de Trekkers is daan ouch ein vaan de Hoofzake aofgeloupe: De Groeten Optoch.
Same mèt Zienen Hoegen Hoeglöstegheid weurt daan same op de trappe vaan ’t Theater eine gedroonke, um ziech daonao verkleit of in Trekkers-outfit tösse ’t Vastelaovend Vierend Volk vaan Mestreech te storte.
