De Rieu-conzèrs Juli 2025

Sinds 2005 helpe veer, oonaofgebroke, mèt bij de conzèrs vaan Andre Rieu.

De werkzaamhede zien veur us in die jaore neet veranderd. Veer höbbe ’n hospitality-functie binne dees conzèrs.

Um half 5 bijein koume, briefing, lunchpakkèt gebruke en roond de klok vaan 17.20 oor nao of de Staotestraot of de Breistraot goon.

Klokslaag 17.30 oor weurt ’t Vriefhof aofgeslote en starte veer mèt vege, umtot ’t plein leeg moot zien. De hoeg hèkke weure door de mètwèrkers vaan Rieu opgehaold en de restaurateurs doen de lètste taofele aonkleie. Tössedoor helpe veer de stewarts en beveiligers mèt bij, oonder aandere, lui nao de parking bringe en/of nao boete bringe.

Klokslaag 18.30 oor goon de hèkke ope. Veer oondersteune daan de lui die neet wete boe hun gerizzerveerd restaurant is, begeleie lui nao ’t rolstoolvak, en nao d’n in/oetgaangk graasj en veer doen ouch nog aander hand-en-spandeenste.

Um 21.00 oor begint ‘t conzèr, eus rol is daan daoveur zörge tot de terrasbezeukers neet goon loupe en stoon bij de binnehèkke. Ze weure daan op ’n nette meneer aongesproke um trök plaots te numme op ’t terras.

Bij ‘t ind vaan ‘t conzèr helpe veer nog mèt bij ’t rolstoolvak zoetot de rolstoolgebrukers zoonder perbleme dit vak kinne verlaote.